Луис Хамилтон ќе стартува прв и во утрешната трка за ГН на Бразил, претпоследна во Формула 1 шампионатот во оваа сезона. Британскиот возач на Мерцедес имаше најдобро време во официјалните квалификации на патеката „Интерлагос“ и со најбрз круг од 1:10,736 минути ја обезбеди 60. пол-позиција во кариерата.
Од првиот ред, со него, ќе почне и вториот пилот на Мерцедес, Нико Розберг. Зад нив ќе бидат Кими Раиконен и Макс Ферстапен.
На две трки до крај на сезоната, Розберг е лидер во генералниот пласман со 349 бода и за прва титула во кариерата во Формула 1 му е потребна победа. Хамилтон е втор со 330 бода. Во случај Британецот да успее да слави утре попладне (17 ч. по средноевропско време) во Бразил, победникот во шампионатот ќе биде промовиран во последниот натпревар на 27 ноември во Абу Даби.