Руските научници открија тајна нацистичка база во Арктичкиот Океан, напуштена пред повеќе децении.
Тајната база била изградена во 1942 година под името “Schatzgraber” (“Трагач по богатство”) од луѓето на Адолф Хитлер во текот на Втората светска војна, пишува денес Индепендент. Таа се наоѓа на островот “Земја Александра” и служела за складирање на муниција и метеоролошки и стратешки алати и предмети.
Според руските научници, луѓето кои биле во базата најверојатно ја напуштиле поради епидемија предизвиката од консумација на месо од поларна мечка. Преживеаните биле спасени од германска подморница која била испратена како помош.
Освен тоа, нацистичките војници во базата имале најверојатно задача да чуваат или да трагаат по некое богатство па оттука е и името на базата.
Групата руски научници прво откриле канти за бензин, рѓосани куршуми, документи, разни остатоци или урнатини на бункерот. Индепендент пишува исто така дека тајната база играла улога и во планирањето на движењата на нацистичките трупи, подморници и други бродови поради тоа што во базата се предвидувале метеоролошките услови на, за тоа време, софистициран начин.