Денеска во 19 часот работниците со полна пареа работеа на театарот со цел да го подготват за утрешното отворање.
Околу 50-ина работници вредно работеа на партерното уредување и иако беше 19 часот тие немаа абер од запирање. Надвор пред театарот се работеше на поплочувањето, како и на партерното уредување. Се чистеа тукушто поставените плочки, како и тротоарот пред театарот, па дури и улицата.
Плочки се поставуваа насекаде со цел тие целосно да бидат поставени до утре, а се слушаа и машините кои ги сечеа плочките до потребната големина.
Покрај ова, на двете страни од влезната врати поставени се и две посебни скулптури, кои ќе ги дочекуваат гостите.
Новата зграда на Македонскиот народен театар ќе биде предадена утре а за отворањето во петок се подготвува музејска театарска поставка, што ќе првиот театарски музеј во земјава.
„Плакати, монографии, документи, лични предмети, реквизити ќе сведочат за богатата театарска меморија на оваа земја“, вели театрологот Јелена Лужина.
За барокната орнаментика на театарот бил задолжен тим од десетина уметници и историчари на уметноста предводени од Елизабета Димитрова од Факултетот за историја на уметноста.
Во театарот има и 46 скулптури. Големата сцена има 724 седишта, а малата – 215.
Според податоците од Бирото за јавни набавки, театарот чини 39 милиони евра. Од кои за скулптури на фасадата и партерот се потрошени речиси 580 илиади евра.
За завесата во овој театар се потрошени 582 илјади евра.
За ентериерот, позлатените орнаменти и и осветлувањето се потрошени 11, 5 милиони евра.