Фотографија на која една девојка мирно пружи отпор пред полициски службеници вооружени од глава до пети во САД, на социјалните мрежи се врти како симбол на протестите кои изминатите денови се одвиваат во САД по низата убиства на обични граѓани и полицајци.
На фотогорафијата на Џонатан Бејкман, а во сопственост на агенцијата Ројтер, се гледа девојка која стои во средина на улицата додека двајца полицајци се подготвуваат да ја уапсат во Батон Руж во Луизијана.
Оваа фотографија следува по моќната фотографија неодамна објавена во Шведска на која активистката Марија-Тереза Тес со крената тупаница “ја сече“ колоната од стотици нео-Нацисти во знак на протест на нивниот марш.
Од фотографиите кои во минатото станале симбол на отпорот кон доминацијата ги издвојуваме уште и фотографијата од Тиананмен плоштадот во 1989 кога демонстрант на 5.јуни застана пред железните тенкови на кинеската војска која насилно влезе на плоштадот да ги растера протестите.
И Македонија има свој пример за моќни фотографии како рефлексија на применување на сила од страна на полицијата. Активистката за човекови права, Јасмина Голубовска, на големите протести минатата година по објавувањето на бомбата на опозицијата за смртта на Мартин Нешковски, на полициската сила одговори со доза шарм.
Заглавена помеѓу полициските штитови и демонстрантите, Голубовска пред да го бакне штитот му порачала на полицаецот дека неговото место е со народот.
„Му зборував тивко дека треба да ни се придружи, дека не мора да биде послушник на наредбите и дека неговата должност е пред народот и Уставот. Му кажав дека татко ми е пензиониран полициски службеник и дека сфаќам колку му е тешко…Многу брзо го бакнав штитот, тој не се помрдна но го видов како се насмевна“.