Франција и Германија денеска во писмо до високиот претставник на Европската унија за надворешна политика и безбедност Кетрин Ештин се заложија за „иновативни“ начини за унапредување на воената соработка во Унијата.
Во писмото се нагласува одговорноста на ЕУ за обезбедување на мир и безбедност во „светот, кој се менува со нови центри на моќ и во кој зајакнуваат новите закани за безбедноста, како што се кибер криминалот и тероризмот“.
Париз и Берлин нагласуваат дека во услови на ограничени ресурси, членките на ЕУ мораат правилно да ги употребат за да ја обезбедат способноста на Унијата да реагира. Тоа би вклучувало соработка во областите, како што се транспортот, дополнување со гориво на авионите во воздух, медицинска опрема и друго.
Писмото го потпишале министрите за надворешни работи на Франција и Германија.