Франција во петокот објави дека нејзини авиони почнале воздушни напади над терористички цели во Ирак, пренесе агенцијата „Ројтерс”. Ова е прв напад откако Париз вети дека ќе се приклучи кон активностите на други земји против групата „Исламска држава”, која држи под контрола големи територии од блискоисточната држава.
„Утрово во 9:40 часот. нашите ловци го започнаа првиот воздушен напад против логистички магацини на терористи”, се вели во соопштението на претседателот Франсоа Оланд. Според изјавата метата во североисточен Ирак била целосно уништена, а нови напади се очекуваат „во наредните денови”.
На прес-конференцијата во четвртокот Оланд соопшти дека воздушните напади претстојат и ќе стартуваат веднаш штом разузнавачките француски летови ги идентификуваат целите. Тој појасни дека операциите ќе бидат само на територијата на Ирак и нема да вклучуваат испраќање на војници.
Франција и порано има изразено желба да учествува во воената, политичката и финансиска коалиција, формирана од САД против милитантите на „Исламската држава”, кои се уште владеат со големи територии во северен Ирак и соседна Сирија.
Американски воени авиони од почетокот на август до овој момент извршиле повеќе од 170 напади против групата во Ирак, во обид да ги заштитат претставниците на САД во земјата, како и некои од клучните ирачки инфраструктурни објекти.
Воздушните напади помогнаа на ирачките и курдски сили да си ги вратат клучни места за борби како, браната крај Мосул и другите помали градови.
Минатата недела американскиот претседател Барак Обама изјави дека дал дозвола за вршење на воздушни напади против цели на исламистите и во Сирија.
Во понеделникот Париз беше домаќин на меѓународната конференција во која учествуваа голем број европски и арапски земји, како и претставници на Европската унија и Арапската лига. Целта на состанокот беше да се координираат меѓународни дејствија против „Исламската држава”.