Богата понуда на филмови и реномирани синеасти е најавата за овогодинешното издание на Фестивалот на француски филм во Македонија. Манифестацијата свечено ќе се отвори на 18 јуни во 20 часот во кино „Милениум“ со прикажување на филмот „Ке Д’Орсе“, на Бертран Таверние и ќе трае во наредните четири дена.
За четврток, во кинотека на Македонија најавена е проекција на филмот „Капетан Конан“. Станува збор за нередите и пљачкосувањата кои се случуваат во Букурешт, каде Норбер има задача да ја докаже вината на обвинетите, луѓето на капетан Конан.
И покрај бесот на Конан, кој ги брани своите војници против сите, Норбер ќе ја изврши докрај својата должност.
Кино Фросина ќе се прикаже филмот „ИВ СЕН-ЛОРАН“ на Жалил Лепер. Ив Сен-Лоран е повикан да го преземе управувањето со престижната куќа за висока мода, основана од Кристијан Диор, кој умира непосредно пред тоа. Во текот на неговата прва триумфална модна ревија, се запознава со Пјер Берже, средба што ќе му го промени животот.
Веднаш потоа во Кино Фросина следува промоција на филмот „Венера во крзно“ на Роман Полански.
Во текот на фестивалот ќе се прикажат и филмовите „Светлина на зората“, каде специјален гостин е режисерот Жан-Кристоф Розе, потоа „Газели“ на Мона Ашаш, „Заминување“ на Емануела Берко и многу други.
Целта на манифестацијата е балканскиот регион да се запознае со францускиот филм, да се овозможи на гледачите да погледнат избор од најновите и најдобрите француски филмови и да се остави простор за дискусија на публиката со присутните гости по проекциите.
Целата понуда на францускиот филмски фестивал можете да ја видите на следниов линк.