Невработените граѓани кои минатата година имале повисоки приходи сега ќе плаќаат половина од основицата на просечната плата, односно по 1 333 денари месечно
Од денеска Фондот за здравствено осигурување започнува со автоматска пререгистрација на невработените и граѓаните со ниски примања кои треба да се јават во подрачните служби на Фондот само доколку имаат промени во личните примања.
Невработените граѓани кои минатата година имале повисоки приходи и досега плаќаа по 2 480 денари за здравствено осигурување, сега ќе плаќаат половина од таа сума, односно по 1 333 денари месечно.
Ова го овозможија новите измени на Законот за придонеси со што за половина им е намален износот на лицата кои се невработени, а претходната тековна имале примања до или над 216.102,00 денари.
„Со измените и дополнувања на Законот за придонеси од задложително социјално осигурување објавени во Службен весник на РМ бр. 247 од 31.12.2018 година, лицата со повисоки примања нема да имаат повеќе обрска да плаќаат придонес за задолжително здравствено осигурување на 100% основица на просечната плата во Републиката објавена во јануари во тековната година туку основица за пресметка на придонес за задолжително здравствено осигурување за оваа категорија на осигуреници е 50% од просечната плата во Републиката објавена во јануари во тековната година. Оваа законска поволност ќе ја користат 462 осигуреници“, се вели во соопштението на ФЗОМ.
НОВА неколку пати објави за овој небулозен закон кој беше донесен пред осум години од претходната власт и ги осиромаши невработените граѓани кои беа принудени да плаќаат високи суми за да бидат здравствено осигурани иако за тоа плаќале претходната година кога биле вработени.
Новите измени на Законот за придонеси на овие граѓани не им овозможија целосно ослободување, туку тие мора да плаќаат половина од основицата на просечната плата.
Од ФЗОМ велат дека има нови лимити за здравствено осигурување според нето приходот остварен во 2018, односно дека Министерството за здравство го плаќа здравственото осигурување за лицата чии годишни примања на ниво на семејство биле до 145.980 денари.
Министерство за здравство го плаќа здравственото осигурување и за оние лица кои лани оствариле приход меѓу 145.980 и 216.102 денари, а последните два месеца имале вкупен приход под 24.330 денари.
Само осигурениците кои минатата година имале вкупни приходи меѓу 145.980 и 216.102 денари ќе плаќааат здравствено осигурување од 50 отсто од просечната плата или 1.333 денари месечно, како и оние кои се невработени, а претходната година оствариле приходи над 216.102 денари, односно 50 отсто од просечната плата или 1.333 денари месечно.
Од ФЗОМ соопштуваат дека оние граѓани кај кои има промена во процентот на плаќање на здравственото осигурување ќе добијат извествање од Фондот и дека нема потреба да доаѓаат во подрачните служби.
„Осигурениците кои имаат промена во приходите, како и оние кои за прв пат се регистрираат тоа може да го направат од први февруари до 31 март годинава, треба да дојдат во подрачните служби за да се направи пререгистрација“, велат од ФЗОМ.
Од ФЗОМ известуваат дека доколку се утврди дека осигуреното лице спаѓа во друга категорија со повисоки приходи, а не пријавило дека има приходи и користело здравствени услуги, по службена должност ќе се донесе решение за престанок на својството на осигурено лице.
„Со тоа му се укинуваат правата од задолжителното здравствено осигурување, освен правото на итна медицинска помош. Овие лица на кои нема да им се продолжи здравственото осигурување поради повисоки приходи од наведените лимити ќе треба да дојдат во подрачната служба да го регулираат своето здравствено осигурување“, се вели во соопштението од ФЗОМ.
Овој закон кој е донесен во 2011 година од претходната власт, од сегашната е оценет како штетен и нелогичен, но го коригираа дури две години од доаѓање на оваа власт.
Сепак и вака како што е поставен со новите измени со плаќање на половина од сумата, овој закон ги дискриминира граѓаните кои останале без работа, а претходната година кога биле во работен однос редовно плаќале здравствено осигурување.
Законот за социјални придонеси донесен во време на екс министерот за финансии Ставревски осум години им одеше на штета на граѓани кои останале без работа и мораа да плаќаат за здравствено осигурување само заради тоа што претходната година работеле и одвојувале придонеси за тоа
Фондот за здравствено осигурување редовно се правда дека само спроведува закон кој е донесен од Министерството за финасии, а оваа категорија граѓани остануваат и понатаму да плаќаат и не се целосно ослободени како и останатите невработени лица.