Газпром соопшти дека ја зголемува цената на гас за Украина на 385,5 долари за 1000 кубни метри. Зголемувањето важи за вториот квартер, а претходната цена изнесуваше 268,5 долари за 1000 кубни метри гас.
Претседателот на Газпром Алексеј Милер во Москва изјави дека украинскиот долг за гас изнесува 1,7 милијарди долари.
Со денешното покачување на цената за над 40 насто заврши попустот договорен пред политичката криза во Украина во која од власта беше остранет претседателот Виктор Јанукович, поддржан од Москва, а Русија пак изврши анексија на украинската област Крим.
По повеќемесечни протести и соборување на проруската влада, Украина економски се наоѓа на работ на бездна. Дефицитот во буџетот, повеќе од десет процетни од економскиот учинок, се заканува да излезе од контрола. Стопанството е зависно од странство, надворешните долгови се високи, а индустријата во големи делови е пропадната.
Украина затоа се надева на кредити за помош од САД, Европската унија и Меѓународниот монетарен фонд. ММФ изминатата недела навести можност за кредити во висина од 14 до 18 милијарди долари, кои треба да бидат врзани за услови. Покрај економски реформи ММФ бара покачување на цената на гасот на „вообичаено пазарно ниво“. Цената на гасот во Украина со години е субвенционирана од државата.
Украинскиот државен концерн „Нафтогас“ најави покачување на цената за 50 проценти веќе од 1. мај, за со тоа да се исполнат условите кои ги бара ММФ. Освен ова концернот најави натамошно покачување на цената во наредните години. Деталите ќе треба да ги утврди владата.