Најновите податоци за натамошниот пад на француската економија објавени во петокот укажуваат на дополнително продлабочување на јазот меѓу најголемите економии на еврозоната, со оглед дека германската економија во вториот квартал најверојатно остварила осетен раст.
Францускиот завод за статистика во петокот соопшти дека индустриското производство во јуни паднало за 1,4 отсто во однос на претходниот месец, откако во мај ослабна за 0,3 отсто.
Притоа во јули евидентиран е остар пад на производството на храна и на автомобили.
Продолжениот пад на производството лоша е вест за францускиот претседател Франсоа Оланд кој вети дека до крајот на годината ќе ја промени состојбата на пазарот на труд, но тоа е сега помалку веројатно.
Имено, стапката на невработеност во првиот квартал изнесуваше 10,8 отсто, а некои економисти очекуваат кулминација наредната година.
Француските податоци се во дијаметрална спротивност со оние од Германија, чие индустриско производство во јуни порасна за 2,4 отсто.
И другите макроекономски податоци укажуваат дека најголемата европска економија веројатно осетно пораснала во периодот од април до јуни, пред се благодарејќи на личната потрошувачка и инвестициите во градежништвото, објави во петокот германското министерство за економија, пренесува макфакс.
„Личната потрошувачка и натаму претставува важен столб во економијата, како и во првото тромесечје, а веројатно силен е нејзиниот придонес во вториот квартал“, стои во редовниот извештај на министерството.
Германија на почетокот на годината успеа да избегне рецесија, откако нејзините активности се намалија на крајот од минатата година. Првата проценка за БДП за вториот квартал ќе биде објавена на 14 август, а економистите проценуваат раст од 0,6 до 1 отсто.