Утре од 20 часот на платформата од ГТЦ кон паркот „Жена борец“ ќе се одржи четвртиот по ред настан под мотото „Го сакам ГТЦ“ по втор пат во обликот ГТЦ Форум.
Серијата настани „Го сакам ГТЦ“ се реакција на проектот за нова фасада и доградба на Градскиот трговски центар со кој целосно би се уништила архитектурата на објектот, како и неговата урбанистичка улога на „улица“ низ централното градско јадро.
„Настаните во јули се префрлаат од петочните во четврточните вечери. Резервирајте ги за ГТЦ и градот“, велат од Асоцијација на архитекти на Македонија.
Како што нагласуваат од таму, 70% од објектот на ГТЦ е јавен простор. Тој, архитектонски, претставува „реплика“ на агора/форум, која ги канализира и физички ги опслужува општествените потреби на граѓаните на Скопје во последните четири децении. Во таа смисла, ГТЦ ФОРУМ претставува надоврзување на основната функција на овој објект како јавен простор.
Досега како говорник на ГТЦ ФОРУМ е најавен режисерот Александар Поповски, а во текот на денот на Facebook страницата на Асоцијација на архитекти на Македонија ќе се обновува листата на потврдени учесници. Како и претходниот пат, во дискусијата слободно ќе можат да се вклучат и сите граѓани кои сметаат дека за овој проблем треба да се разговара јавно.
На овој собир ќе продолжат стандардните активности:
• собирање потписи за петицијата за зачувување на ГТЦ во неговата автентична физичка состојба;
• пишување мислења за самиот ГТЦ: „Зошто го сакам ГТЦ?“;
• пишување пораки, идеи и препораки до архитектите на новата псевдоисториска фасада и до управата на ГТЦ;
Дополнително, ќе бидат јавно прочитани отворените писма до надлежните и ќе биде изложена и отворена за дискусија измената и дополната на Деталниот урбанистички план за Мал ринг од декември 2012г.
„Трансформацијата и еволуцијата на градот се логични и неизбежни, но ретко носат вакви проверени позитивни примери како Градскиот трговски центар кои создале нова вредност, но истовремено го испочитувале постојното. Било какви измени на вака важни објекти за историјата, културата, за функционирањето на еден град, треба да се прават многу внимателно без да се наруши основниот концепт на авторот и со задржување на неговите суштински вредности. Имаме историска обврска да реагираме“, велат од Асоцијација на архитекти на Македонија.