Преполовен е бројот на муслимани кои годинава заминаа на аџилак во Саудиска Арабија. Годинава одењето на аџилак остана во сенка на смртоносниот корона вирус кој во изминатите месеци однесе десетици животи.
Околу два милиони верници се собраа да се молат во Мека, пред утрешното заминување на ридот Арефат, што преставува врв на аџилакот, по што доаѓа Курбан-Бајрам. Саудиските власти тврдат дека ги превземале сите мерки на безбедност.
Мобилизирани се огромен број на медицински екипи и цивилна одбрана, а во болниците имаат изолирани простории во случај да се појави сомнителен случај. Голем дел од верниците носат маски за да се заштитат, но поголемиот дел не се информирани за болеста јавува Ал Џезеира.
Вирусот кој го напаѓа респираторниот систем е познат како МЕРС, и од него веќе се заразени 119 луѓе во Саудиска Арабија, а 51 починаа.
-Повеќе сум заинтересиран да научам како да го направам аџилакот. Не се распрашував за болеста . Осум дена сум тука и добро се чувствувам вели Мохамед Саед.
Светската здравствена организација нема многу податоци за тоа како се шири болеста, но саудискиот министер за здравство изрази загриженост.
-До овој момент ситуацијата е под контрола и нема знаци за ширење на епидемија и заразни болести вклучувајќи го и МЕРС изјавил министерот Абдула Ал Рабиан.
Досега во светот се регистрирани 135 случаи на МЕРС, од кои најголемиот број се во Саудиска Арабија. Засега се знае дека вирусот се пренесува од човек на човек, но начинот и времето на инкубација сеуште не се познати.