Првиот ден од теренската вакцинација, без закажан термин, ги преполни вакциналните пунктови. Уште од рано изутрина се создал метеж пред скопските Поликлиники, за што сведочат и фотографии објавени во медиумите. Граѓани сведочат дека во Поликлииката „Јане Сандански“ во скопската населба Аердором интеревенирале екипи на МВР за да ја смират толпата која нетрпеливо чекала да влезе на вакцина. Потврда за ова добивме и од раководнот тим на Поликлиниката.
„Точно е дека утрово имаше голем метеж пред нашата Поликлиника. Дојдоа граѓани кои имаа закажано ревакцина, згора еден поголем број на луѓе кои без термин дојдоа да се вакцинираат. Се направи турканица, сите сакаа да влезат внатре, што поради топлото време, што поради желбата побрзо да завршат работа. Полицијата беше на лице место и воспостави контрола. Еве и сега имаме метеж пред пунктот, но не како утрото“, рече за Нова ТВ раководителот на „Јане Сандански“, Боре Радевски.
Министерот за здравство, Венко Филипче, кој го посети новоотворениот вакцинален пунк во Шуто Оризари, најави можно вклучување на Армијата за да се направи ред за вакцинација.
„ Ќе разговараме со директорите на сите Здравствени дмови за да видиме како да се организра редот. Се уште имаме можност и се уште ги корстиме ресурсите и на Армијата, така да имаме механизми за да воспоставиме ред. Ќе видиме денешниот ден како ќе помине па каде ќе треба ќе интервенираме“, рече Филипче.
Најмалку 40 жители на населбата Шуто Оризари примиле прва доза од анти ковид вакцината на пунктот кој утрово беше отворен во тамошната Поликлиника.
Од денеска во 29 општини во Северна Македонија стартуваше теренската вакцинација, а во текот на денот медицинските екипи ќе посетат вкупно 107 населени места. Теренската вакцинација се врши со кинеската вакцина „Синовак“ која според здравствените власти е најлесна за транспорт и употреба.
„Согласно веќе направениот распоред, од утрово, тимови на здравствените домови, со малите фрижидерчиња, вакцинираат по оддалечените рурални места и селата. Сето та паралелно на процесот на вакцинација кој редовно се спроведува во рамки на здравствените домови. Имунизацијата ќе се одвива без прекин, а распоредот кои населени места ќе бидат посетени од страна на медицинските тимови го прават директорите на здравствените домови“, рече министерот Филипче и најави дека процесот ќе биде повторувачки.
„Значи нема да се оди само еднаш во едно село или населено место, туку тимот ќе ротира откако сите мали места по еднаш ќе бидат покриени. Сметам дека на овој начин значително се олеснува пристапот на граѓаните до вакцина на целата територија на нашата држава“, рече Филипче.
За вакцинација без термин доволен е само документ за лична идентификација, за да можат здравствените работници да ги запишат податоците на граѓаните во системот „Мој термин“. Вакцинирањето без термин ќе се одвива само по Поликлиниките, додека во салата „Борис Трајковски“ во Скопје и останатите сали низ земјата, каде што досега се спроведуваше масовна вакцинација, ќе има само ревакцинација на граѓаните со термини. Сите Поликлиники ќе работат во две смени, само новиот пункт во Шуто Оризари ќе работи во една смена од 7.30 до 14.30 часот.
Во однос на вацинацијата на деца на возраст од 12 до 16 години задолжителна е регистрација на сајтот вакцинација.мк. Пријавувањето ќе трае од денеска до четврток, а имунизацијата кај децата со вакцината на „Фајзер“ ќе стартува во петок.
Биљана Божиновска