Над 1.300 учесници денеска се вклучија во еколошката акција во Ресен, организирана од граѓанската иницијатива „Еко герила Преспа“.
Од граѓанската иницијатива велат дека бројката на учесници ги надминала нивните очекувања.
– Денес најмалите беа најголеми. Денес тие ни покажаа на сите нас дека знаат, сакаат, умеат и можат да ги подобруваат работите во нашава Општина, во нашето мало место на живеење, кое сите си го сакаме најмногу. Денес најмалите беа прекрасни. Денес имаше толку многу позитивна енергија, која се уште кружи низ нашата општина. Денес најмалите научија една вредна лекција, која ќе ја паметат долго – пишува во соопштението од иницијативата.
Во еколошката акција учествувале ученици од основните училишта од Општина Ресен и од С.О.У. „Цар Самоил“.
Од основното училиште „Мите Богоевски“ учествувале 502 ученициз заедно со подружното училиште во село Јанковец, од О.У. „Гоце Делчев“ учествувале повеќе од 300 ученици заедно со подружните училишта од село Избиште и село Сопотско, од О.У. „Славејко Арсов“ од село Подмочани, учествувале повеќе од 80 ученици, од О.У. „Димитар Влахов“ од село Љубојно и околните подружни училишта учествувале повеќе од 90 ученици, од О.У. „Браќа Миладиновци“ од село Царев Двор учествувале повеќе од 70 ученици и од С.О.У. „Цар Самоил“ учествувале повеќе од 310 ученици.
