Во понеделник министерот за здравство Никола Тодоров ќе се сретне со родителите на Митко Влајков, 18 годишното момче од Кавадарци кое почина на фудбалски натпревар пред еден месец. Семејството побара средба со Тодоров, по сознанието дека лажната докторка интервенирала во моментот кога на нивниот син му се слошило пред да излезе на теренот.
Тие бараат одговорност за надлежните од болницата во Кавадарци кои направиле превид на дипломата на „лекарката“ но, и одговор зошто резултатите од обдукцијата, Судска медицина не им ги соопштува цел месец.
-Од Министерството ја бараме вистината и само вистината, да си ја завршат работата за вакви случаи во државата повеќе да не постојат. Да било навреме јавено за неа,сега детето можеби ќе било живо. Чекаме што ќе покаже обдукцијата. Знаеме дека му се дадени инекција во срцето и електрошокови изјави за Телма таткото Дамјанчо Влајков.
Скандалот со фалсификуваната диплома на „лекарката“ кој го потресе Кавадарци, но и целата држава, отвори сомнеж кај родителите, дали во тие моменти лажната лекарка помогнала или одмогнала. Дваесет и седум годишната девојка за која се потврди дека стигнала само до втора година на медицинскиот факултет, била во екипата на Итната медицинска помош и интервенирала во кобниот момент.
-Можеби таа сакала да помогне, но сега останува сомнеж дека неговиот живот можел да се спаси вели таткото на починатото момче.
Иако семејството сеуште не е информирано, од извори во истрагата НОВА дознава дека наодот од обдукцијата е завршен и веќе е предаден на истражен судија. Не е познато дали Тодоров,тоа ќе им го соопшти на семејството во понеделник и дали официјално ќе им биде предаден наодот од обдукцијата на нивниот син.
Нефицијално, форензичарите утврдиле дека момчето починало од природна смрт, од воспаление на срцевиот мускул кое го добило веројатно по прележан грип. Наводно, интервенцијата на „лажната лекарка“ немала влијание врз смртта на момчето. Дали овие неофицијални информации ќе се потврдат, останува да видиме.
Но, и доколку се покаже дека е така, останува отворено прашањето за одговорноста на надлежните во болницата кои дозволиле неука девојка да прегледува, поставува дијагнози и да лекува пациенти на кои им е неопходна итна медицинска помош и кои најчесто се во животно загрозувачка состојба.
Против неа веќе е поднесена кривична пријава за измама, надрилекарство и фалсифување на документи. Ова е прв ваков случај во државата, како и во историјата на македонското судството.