Детска градинка во Кавадарци се гради без одбрение од ИЗИС со кое се потврдува стабилноста на објектот, потврдија за НОВА од Институтот за земјотресно инженерство и инженерска сеизмологија(ИЗИС). Општината пред да почне со градбата на објектот воопшто не побарала мислење од ИЗИС бидејќи сметале дека за реконструкција на објект не е потребно да бараат одобрение од експертите со кое ќе се потврди механичката стабилност, тврдат за НОВА извори кои се добро упатени во случајот.
Сепак, по многу бројните укажувања од надзорниот инжењер дека објектот е нестабилен, Oпштината во последен момент одлучила да го промени првичниот проект и сега се става потпора на зидовите кои претставувале потенцијална опасност. Но, Општината се уште нема никаков доказ за механичката стабилност на објектот, тврдат во ИЗИС.
Градинката која пред неколку дена ја промовираа заменик министерот Диме Спасов и градоначалникот Алексадар Панов, за која НОВА веќе пишуваше, се гради на темелите и зидовите на старата лабораторија. Објектот се наоѓа сред Медицински центар и тоа на пет метри до биохемиската и микробиолошката лабораторија, на два метри од амбулантата за Кожни и венерични болести, Итната медицинска помош, а на 50 метри подолу е Центарот за метадонска терапија за зависности.
Според информациите до кои дојде НОВА, за што поседуваме и валидни документи, проектот по кој започнала изградбата на објектот бил нестабилен и опасен за користење. Инжињерката која вршела надзор на објектот неколку пати апелирала до Општината да се преземат мерки бидејќи „објектот нема врзна, меѓукатна конструкција поради тоа што бил изваден покривот така што зидовите немало како да се поврзат, со што објектот ја губи стабилноста и преставува потенцијална опасност“.
Во едно од писмата до кои дојде НОВА, која вршела надзор на објектот Лидија Стојанова која заради ваквите сомнежи се повлекла од надзорот, во јуни годинава ја предупредува Општината дека зградата е нестабилна. Стојанова пишува дека објектот не е сигурен и советува да се побара второ експертско мислење, доколку се продолжи да се работи според истиот проектот.
НОВА ја контактираше Стојанова која потврди дека барала да се преземат итни мерки и инсистирала да се направи ревизија на проектот за да се докаже стабилноста на проектираната зидана конструкција. Таа укажува дека Општината и сега го крши Законот за градба бидејќи измените и дополнувањата на основниот проект изискуваат одобрение од ИЗИС.
„ Разбрав дека Општината во последен донела одлука да не се гради по првичниот проект за кој постоеше опасност да се урне врз главите на децата. Нелогично беше да се гради понатаму бидејќи беше изваден покривот, така што го немаше она што е неопходно, врзна, меѓукатна конструкција која ќе обезбеди заедничка работа на сите зидови. Но и сега со измените не се докажува стабилноста, а се крши и законот за градба во член 43, како и во член 48 каде се прецизираат деталите за основните проекти за реконструкција“, изјави за НОВА Стојанова.
Таа смета дека Општината треба да се произнесе дека со измените кои ги направила во текот на градбата не се нарушила механичката отпорност која е докажана за првиот одобрен проект.
Иако Општината одлучила да отстапи од првичниот план на реконструкција, експертите сметаат дека се уште нема доказ дека објектот во кој ќе престојуваат деца е стабилен. Таков документ може да издаде само ИЗИС.
Од Општина Кавадарци тврдат дека имаат Одобрение за реконструкција и адаптација со пренамена на просторот за изградба на детска градинка согласно Законот за градење и Договор за јавна набавка за изведување на градежни работи да се изведуваат градежните работи на објектот на старата лабораторија.
„Бидејќи се работи за стар објект од масивни носечки зидови со проектното решение беше предвидено зајакнување на постојната конструкција со изведба на столбови и греди(скелетна конструкција) со што неоштетените носечки зидови се задржуваат како преградни бидејќи ја губат функцијата за носечки зидови“, објаснуваат во писмениот одговор од Општина Кавадарци.
Од таму тврдат дека по отстранување на кровната конструкција се јавуваат нови видливи пукнатини на зидовите кои било предвидено да се задржат.
„Од тие причини согласно Извештајот и записникот од страна на стручни лица од општината, надзорниот инжињер, изведувачот и проектантот беше одлучено оштетените зидови да бидат целосно отстранети и повторно изsидани без дополнителни промени во однос на проектната документација. Овој зафат беше преземен во интерес на стабилноста и функцијата на објектот“, се вели во одговорот од Општината.
Од таму испратија фотографии со кои тврдат дека се зајакнуваат зидовите на детската градинка.
Во Кавадарци постои голема потреба од изградба на нова детска градинка бидејќи постојните капацитети не ги задоволуваат потребите. Во градот има неколку објекти кои се клонови на постоечката детска градинка кои имаат капацитет за 550 деца, а во нив се згрижени двојно повеќе, односно 1060 деца. Поради неопходната потреба од нов објект во ноември минатата година Советот на општината едногласно ја изгласал одлуката за изградба на детска градинка. Но, советниците не биле известени дека објектот ќе се гради на темелите на старата лабораторија и тоа сред Медицински центар, место за кое советниците од опозицијата сметаат дека не е добро за развојот и психата на децата кои ќе се будат со звук на сирената од Итната медицинска помош.
Изградбата на новата градинка, како што соопшти заменик министерот Диме Спасов ќе чини 7, 5 милиони денари, а во неа ќе бидат сместени 100 тина деца. Но, изградбата на новиот објект врз постоечката стара лабораторија фрли сенка и внесе страв кај граѓаните. Во Кавадарци веќе се коментира дека локални моќници си земале за право да се постават над безбедноста на децата, над законите во државата, без да обезбедат мислење и да докажат дека објектот е стабилен.