Граѓаните на општина Богданци кои излегоа на референдум се изјаснија против продолжување со работа на рудникот „Казандол“ и отворање на рудници на територијата на општината, потврди Општинската изборна комисија по сумирањето на резултатите.
„Од вкупно запишаните 6.918 граѓани на референдумот по двете прашања се изјасниле вкупно 4.321 или околу 62 отсто од гласачкото тело што значи дека референдумот во општина Богданци е успешен“, изјави Венера Зелева, претседател на ОИК Богданци.
Зелева нагласи дека 4.120 граѓани се изјасниле против продолжување со работа на рудникот „Казандол“, а 4.126 од излезените гласачи биле против отворање на рудници на територијата на општина Богданци.
Следната недела по истите прашања на референдум ќе излезат граѓаните на општина Дојран.