Грчката економија во првиот квартал од оваа година забележала најмал минус последниве 5 години. Надежите се дека ситуацијата дополнително ќе се поправи со годинешната туристичка сезона.
Според податоците на грчката статистичка служба, грчката економија во првиот квартал оваа година забележала пад на брутодомашниот производ од 0,9 проценти, наместо очекуваните 1,1 процент. Извозот во првите три месеци се зголемил за 5,4 проценти во однос на истиот период минатата година. За тоа е одговорен плусот во секторот на услужни дејности. За оваа година се очекува освен тоа рекорден број посетители од странство.
По лошата туристичка 2012 година, лани Грција регистрираше рекорден број од речиси 18 милиони туристи. За годинава туристичките работници се надеваат дури на 20-милионска посета на туристи.
Минатите години оваа бранша страдаше поради економската и финансиска криза. Извештаите за протестите и мизерната економска состојба на земјата ги одвратуваа туристите, но минатата година ситуацијата се стабилизираше.
Економски кризната земја веќе шеста година се наоѓа во рецесија, но најновите податоци кај владата будат надеж дека во стопанството конечно ќе настапи долго очекуваниот пресврт кон подобро.
Извор: Дојче веле на македонски јазик