Грчката фирма „Интеркат“ се обврзала дека ќе ја преземе изградбата на Клиничката болница во Штип, откако подизведувачот „Бетон“-Штип отиде во стечај. Дознаваме дека „Интеркат“ ја активирала банкарската гаранција, откако претходно, во ноември минатата година грчката фирма не го продолжи договорот со „Бетон“- Штип. Од тогаш замре и работата со изградбата на Клиничката болница и на бункерот за акцелераторот, механизацијата и работниците се повлекоа, а работата беше стопирана.
„Грчката фирма „Интеркат“ ја превзеде работата околу изградбата без подизведувач. Нема да има распишување на нов тендер бидејќи договорот е потпишан со нив. Сега ни доставија динамичен план и имаат желба да ја завршат работата до крај“, изјави за НОВА, Љупчо Балковски технички раководител на Проектната единица на Банката на Совет на Европа(ЦЕБ).
Балковски вели дека „Интеркат“ се обврзале со изградбата на Клиничката болница и бункерот за акцелератор во Штип да завршат до декември 2020 година. Тој вели дека и фирмата која врши надзор ќе остане и понатаму, а ангажирана е и Општина Штип за изведба во делот на комуналиите.
„Дојде и техничка помош од Банката за да помогнат во техничкиот дел“, рече Балковски.
Претходната власт изградбата на Клиничката болница ја најавуваше уште во 2006 година со доаѓањето на власт, а камен темелникот беше ставен во 2016 година. Беше најавено дека проектот ќе тежи 30 милиони евра, пари од кредитот на Банката(ЦЕБ).
Од тогаш наваму, низа скандали ја следат изградбата на болницата, а досега се завршени 28-29 проценти од работите. Балковски се надева дека за неколку месеци тој процент ќе се зголеми бидејќи веќе се поставува скелето за фасадата, а после тоа ќе започне да пристигнува и опремата за внатрешно уредување, лифтови и слично. Тој вели дека и бункерот за акцелератор е влезен во проектот на болницата, така што грчката фирма ќе мора и него да го заврши во ветениот рок, до крајот на 2020 година.
Инаку, „Бетон“ Штип во изминатиов период беше предмет на истрага на СЈО и вчера отиде под стечај поради долг кон три компании-побарувачи во износ од 76, 7 милиони денари, а е замешан и во предметот на СЈО „Тендери“ против поранешната министерка за култура Елизабета Канческа – Милевска, која се товари за Злоупотреба на службената положба и овластувања за местење тендер. „Бетон“ Штип беше вклучен во изградбата на Проектот Скопје 2014.