Грчкиот парламент доцна синоќа со 153 гласа и со 142 гласа против,го усвои рестриктивниот буџет за 2014 година, со кој е предвидено намалување на државните трошоци од 3,1 милијарди евра.
Владата на премиерот Андонис Самарас ја доби поддршката на мнозинството пратеници во парламентот за предложениот буџет, со кој е предвиден крај на рецесијата, која во земјата трае од 2008 година.
„Ова е историски ден. Жртвите дадоа резултат и ги променија трендовите во земјата”, рече пред пратениците премиерот Антонис Самарис додавајќи дека станува збор за буџет на заздравување и надеж.
Опозицијата остро го критикуваше предлог буџетот, сметајќи го за привремен, имајќи предвид дека него не го одобрила сѐ уште „тројката” странски доверители. Претставниците на партијата Независни Грци го нарекоа ваквиот буџет „нов чин во трагедијата на грчкиот народ”, тврдејќи дека долговите ќе ги плаќаат идните поколенија до 2057 година.
На гласањето од 300 пратеници, предлог буџетот го поддржаа 153 пратеници од двете владејачки партии, конзервативната Неа димократија и социјалистите од Пасок.
Грчките медиуми известуваат дека од нејасни причини, еден од пратениците на Неа димократија не гласал. Против грчкиот буџет за 2014 година беа 142 пратеници и еден воздржани, а во гласањето не учествуваа и тројцата пратеници на неофашистичката Златна зора кои се во затвор по акцијата на властите по оваа партија по низата инциденти поврзани со нејзиното дејствување.
Пратениците од левата коалиција Димар којашто во јуни годинава ја напушти владејачката коалиција, гласаше против буџетот барајќи измени на односите меѓу Грција и Европската унија и странските кредитори.
Владата во Атина предвидува дека во оваа година ќе оствари буџетски вишок од 812 милиони евра, благодарејќи на приходите од даноците повисоки од очекуваните.
Претходно се предвидуваше вишок од 344 милиони евра, но Грција и нејзините странски кредитори не се согласуваат со прогнозите за идната година. Грчката економија се намали речиси за четвртина од 2008 година, кога земјата се најде во длабоката финансиска криза и неможноста да го отплатува својот огромен долг.