Грција ја затвори границата со Македонија за сите бегалци и мигранти, без разлика од која земја и да доаѓаат. Утринава грчки специјални полициски сили се распоредени на границата за да ги спречат нередите кои избија од страна на мигрантите кои не се пропуштаат да влезат во земјата. Тие сега својот бес го фрлаат на бегалците кои доаѓаат од земјите зафатени со војна, а на кои единствено им беше дозволен влез.
„Специјални полициски сили се распоредени од грчка страна за да превенираат немири, заради протестот на мигрантите и заради безбедноста на бегалците кои доаѓаат од Сирија, Иран и Авганистан. За да влезат во Македонија, значи за да ја поминат границата тие треба да пројдат низ разлутената маса од мигранти, а тоа не е безбедно“, објаснуваат за НОВА во УНХЦР.
Повеќе од 3.000 мигранти се блокирани кај импровизираниот камп кај Идомени, во Грција. Меѓу нив е хаос, има нереди и меѓусебни тепачки.
Македонските власти носат дополнителни полициски сили на границата. Од УНХЦР велат дека од македонска страна се подготвени да ги примат бегалците, но Грција засега не пропушта никого.