Владата наскоро ќе објави тендер за издавање под концесија 80 нови локации ширум земјава за изградба на мали хидроелектрани, најави премиерот Никола Груевски.
– До крајот на годинава постапката ќе биде отворена, а се надевам и дека ќе биде завршена. Новина е што овој пат имаме подобро подготвени тендери со направена физибилити студија за секоја од локациите, така што секој инвеститор однапред ќе знае каква хидроелектрана може да се направи, која е нејзината вредност, слабост и предност и со колкава моќ може да располага. Во 80-те мали хидроелектрани ќе се вложат 176 милиони евра, рече премиерот Груевски.
– Нашиот зацртан план е да имаме 400 мали хидроелектрани и за толку се одредени места дека може да се направат низ Македонија. Како завршуваат физибилити студиите дел по дел ќе ги објавуваме, рече Груевски и додаде дека веќе се работи на следната фаза.
Изградбата на малите хидроелектрани, според премиерот Груевски, ќе биде значајна за енергетскиот потенцијал на Македонија.
Потсети дека Владата во овој момент преку АД ЕЛЕМ инвестира околу 33 милиони евра во ревитализација и модернизација на шесте големи хидроелектрани во Македонија.
.jpg)
СДСМ: Груевски нема никаков кредибилитет да зборува за енергетиката
Новото ветување на премиерот Никола Груевски за изградба на 400 хидроелектрани доаѓа 4 години после историски најголемото лажно ветување на Груевски дека ќе обезбеди 8 милијарди евра инвестиции, реагираат од СДСМ.
Тие потсетуваат дека за време на владеењето на Никола Груевски, во изминатите 7 години не е изграден ниту еден енергетски капацитет.
„Просечното годишно производство на електрична енергија на АД ЕЛЕМ е намалено за речиси 8% во однос на периодот до 2006 година.
– Увозот на електрична енергија е зголемен за дури 60%, за што на сомнителен начин и низ нејасни процедури се трошат стотици милиони евра годишно.
– Дополнително, владата на Груевски ја зголеми цената на електрична енергија и ја укина ефтината тарифа што е сериозен удар врз стандардот на граѓаните.
Имајќи го ова предвид, заедно со досегашното пропаѓање на 9 тендери за изградба на хидроцентралите „Чебрен“ и „Галиште“ јасно е дека Никола Груевски нема никаков кредибилитет да зборува за енергетиката“, се вели во реакцијата на СДСМ.
Според опозицијата единствено „успех“ на владата на Никола Груевски е тоа што ја направи Македонија зависник од увоз на струја, трошејќи пари на споменици и барок, наместо инвестиции во капитални енергетски објекти.