Вчера се одржа промоција на книгата „Гуш и Бац“ на графичкиот дизајнер и активист, Зоран Кардула, инспирирана од неговата 11-годишна ќерка Ерато, чија дијагноза е аутистичен спектар на нарушување.
Во преполна сала во Национална галерија Чифте амам, Кардула ја промовираше книгата која содржи 47 измислени зборови на Ерато, преведени на 19 јазици, како и 47 илустрации на нејзините зборови создадени од 33 креативци.
„Се зпочна со една моја објава на Фејсбук на едно зборче на Ерато „Граници не постојат” – „Кајм’пмп“. Реакцијата беше одлична. Започнаа коментари со барања за нови постови и така почнав да ги постирам нејзините зборчиња и се роди #ЈазикотНаЕрато.
Ерато е слабо вербална но од мала она си имаа развиено свој говор за кој ни требаше доста време да го откриеме и да го сфатиме. Кога не знаевме некое зборче и не ја разбиравме ќе не однесеше пред компјутер и на нејзиниот десктоп во кој имаше симнато неколку стотини сликички и точно знаеше која да ни ја покаже за да разбереме што сака да ни каже.
Од тој момент и нас и нејзе ни олесна и некако се тргна на подобро“, раскажува Кардула за НОВА.
Тој вели откако ги објавил зборчињата веке размислувал како да ги спои во книга која би била различна и впечатлива а во исто време да ја пренесе пораката која сака да ја прати за подигање на свеста на Аутизам и нивно прифаќање и интеграција во општеството.
„Само што им ја соопштив идеата на моите пријатели дизајнери веднаш ја прифатија и почнаа да си избираат зборчиња да можат да ги илустрираат. Сите зборчиња на Ерато се преведени на сите јазици кои се зборуваат во Македонија и на уште десетина други јазици со цел да се интернационализира овој проект“, вели тој.
Илустрациите ќе се продаваат, а средствата ќе бидат наменети за реедукација, односно работа со дефектолог и логопед на оние дечиња со аутизам кои не може да си го дозволат тоа.