Преголемиот број на скулптури и споменици, дел од проектот Скопје 2014 резултира со демонтирање и дислоцирање на брзина на скулптурите за кои се исплатени пари од буџетот.
Скулптурата „Ротирачка Македонија“, вредна речиси 100 илјади евра, дело на скулпторот Зоран Костовски, во моментов стои размонтирана зад зградата на Македонската опера и балет, иако во 2009 година беше поставена пред главниот влез на МОБ. Оваа скулптура со уште 27 други беа првите објекти од проектот Скопје 2014.
Костовски тврди дека главна причина што неговата скулптура стои размонтирана е што и пречела на изградбата на новата барокна зграда на АЕК, во близина на МОБ.
Според податоците од Бирото за јавни набавки авторот Зоран Костовски за изработка на ова дело од Министерството за култура добил вкупно 99,458 евра. Но, тој тврди дека добил помалку – 87 илјади евра, откако се одбиле даноците од страна на авторската агенција.
Според Костовски дислокацијата е направена набрзина заради најавената ревизија на новиот градоначалник на Центар, Жерновски.
„Самото Министерство уште од почетокот, на некој погрешен начин ги водеше скулптурите, на нас уметниците ни даде одредени средства да ги направиме делата, тие ги пуштија во авторска агенција и јас зедов 87 илјади евра“, вели Костовски.
Сега авторот Костовски бара достојна локација за својата скапа скулптура, пишува писма до премиерот и до градоначалникот на Центар, бидејќи не се согласува со местото кое му е доделено за неговото дело, а кое било избрано без да го прашаат.