Новиот комесар за проширување Јоханес Хан смета дека на Македонија мора да и се помогне да ја подобри својата економија и да ги подобри условите за живот на своите жители. Хан ова го изјави сабајлево по средбата со вице премиерот за европски интеграции Фатмир Бесими во Брисел.
“Ќе треба во иднина да ги подобруваме макро економски показатели и буџетскиот дефицит. Но исто така би сакал да подвлечам дека моја цел во наредниот период е да се подобри економијата во земјата за да има подобри услови за живот за населението што е авоматски поврзано со правната држава, транспаретноста и борбата против корупцијата. Ако овие услови се исполнат можат да се привлечат директни инвестиции и од земјата и од надвор”, рече Хан.
Комесарот побара од опозицијата во Македонија да се врати во Собранието.
“Би сакал да побарам од политичките партии брзо да влезат во политички дијалог во парламентот а не надвор од него. Би сакал да ја видам опозицијата во парламентот а ако можам со нешто да придонесам тоа ќе го сторам. Имам намера да ја посетам поранешната југословенска Република Македонија во јануари за да разговорам со сите од различните политички партии за да се има напредок”, вели комесарот.
Новиот човек на европското проширување испрати порака дека е во потрага по решение за името но не сакаше да даде детали:
“Дискутираме во овој момент за тоа како да се најде решение кое и одговара на секоја земја и почнавме да разговараме на таа тема. Во моментов не можам да кажам ништо повеќе околу тоа но би сакал да ве уверам дека треба да се деблокира ситуацијата во сите земја а не само во вашата. Во Советот на ЕУ е потреба едногласност (за преговори за членство) и затоа треба да ги убедиме сите земји во тоа.”
Според Бесими “политичкиот дијалог треба да донесе резултати за европската интеграција со тоа што и опозицијата ќе биде во парламентот за да има отворен политички дијалог со сите. Важно е и тоа дека треба да се работи на решавање на отворените прашања со соседи и меѓуетничките односи”, рече Бесими.