Групата “Пријатели на Македонија” денес беше реактивирана во Европскиот парламент (ЕП) во Брисел.
“Пријателите на Македонија” ќе ги води холандскиот либерал Ханс Ван Бален а во неа влегоа 43 европски пратеници што доаѓаат од сите големи политички групи помеѓу кои Словенците Иво Вајлг и Тања Фајон, Словакот Едвард Кукан, Германецот Кнут Флекенштајн, Хрватите Тонино Пицула и Јозо Радош, Бугаринот Андреј Ковачев, Британецот Чарлс Танок или Естонецот Туне Келам.
На средбата на оваа неформална група “Пријатели на Македонија” присуствуваше и шефот на нашата дипломатија Никола Димитров кој изјави дека е поддршката на пратениците е “значајна и мотивирачка за да се изгради демократска, стабилна, просперитетна и европска Република Македонија”.
Спорот со Грција не беше тема на оваа пријателска и релаксирана средба но овој проблем е јасна пречка за напредокот на нашата земја кон ЕУ па оттука не можеше да биде избегнат во разговорите. Во изјава за МИА, Ханс Ван Бален рече дека се надева на брзо решение на спорот за името со Грција за да може Македонија да напредува.
“Се чини дека Македонија сериозно го разгледува ова прашање и компромис треба да се пронајде. Треба да ги убедиме нашите грчки пријатели дека постои држава Луксембург и провинција Луксембург во Белгија, има Холандија и англиска провинција со исто име, и нема никаков проблем. Треба да го прифатат фактот дека во името секогаш ќе има нешто со Македонија. И треба да е прифатливо за Атина, мислам дека и за Грција е важно да има нормализација”, вели Ван Бален.
Бугарскиот европратеник Андреј Ковачев, кој наскоро ќе допатува во Македонија со делегација од ЕП, за МИА изјави дека европратениците имаа задача да им објаснат на своите национални влади дека проширувањето кон Балканот е клучно:
“ЕУ треба да убедува своите граѓани во Германија, Англија, Франција, Холандија дека проширувањето е во интерес на сите нас, не само на земјите од Балканот. Балканот е зона на небезбедност, на различни други влијанија од други земји, и тоа не е добро за ЕУ”, вели тој.
Групата 43 пратеници имаат пред се еден вид лоби улога со тоа што во нивните нивните политички групи и партии ќе го бранат македонското досие и ќе создаваат подобра слика за Македонија.
Групата “Пријатели на Македонија” беше формирана во јануари 2016 година а неа ја водеше хрватската пратеничка Маријана Петир. Во неа учествуваа 26 пратеници.