Хелсиншкиот комитет го повикува јавниот обвинител да се заинтересира за случајот на претепаните деца од ромска националност од страна на Алфите и да покрене постапка против полициските службеници по повеќе основи, согласно Кривичниот законик на Република Македонија.
Сторијата на НОВА за двајцата малолетници кои беа претепани од Алфите предизвика бурни реакации кај граѓаните , а Хелсиншкиот комитет случајот го следи од самиот почеток, по пријавата од родителите.
-Комитетот е згрозен од однесувањето на полициските службеници од единицата
Алфи во нивното постапување кон малолетни деца кои што не се во можност да се
бранат ниту можат да нанесат некаква штета на возрасни полициски службеници. Овој
случај не е прв и Комитетот потсетува дека минатата година ја обележи полициската
бруталност во населбата Топаана каде што граѓани од ромската етничка заедница беа
тепани без никаква причина. Дополнително Комитетот потсетува дека граѓаните од
оваа заедница се почесто се соочува со дискриминаторски однос од страна на
институциите и граѓаните, а особено се жали на третманот кој го добива од
полициски службеници, се вели во последниот извештај на Хелсиншкиот комитет. .
Станува збор за двајца малолетници од кои едниот на возраст од 12 , а другиот на 17 години, кои на 19-ти минатиот месец биле пресретнати во близина скопското Кале од страна на полициската единица Алфи и запрени поради наводно сомнение за сторено кривично дело кражба.
– Според наводите на родителите на двете деца и сведоци од местото на
настанот, полициските службеници веднаш употребиле физичка сила со цел да
изнудат признание од двете деца тепајќи ги со тупаници, клоци, влечење за коса и
гумени палки. Согласно изјавата на двете малолетни деца и родителите полициските
службеници воопшто не разговарале со двете деца туку веднаш примениле
прекумерна сила и по пристигнување на родителите на местото на настанот не
дозволиле никаков контакт. Напротив, родителите добиле закани да не се
приближуваат до нивните деца со наредба да се оддалечат, грубо и непристојно
обраќајќи им се со зборовите „Бегај оттука“ и „Бегај понатаму“.
Подоцна на соочување со оштетената е утврдено дека децата не ја сториле кражбата, по што се однесени во болница. Веќе наредниот ден на Б.М. му се влошила здравствената состојба и е однесен на скоспските клиники каде што е констатирано нагмечување на глава, на врат, нагмечување на граден кош и гребаници по градниот кош.
Хеласиншкиот комитет бара да се покрене постапка за утврдување на кривична одговорност на полициските службеници кои ги тепале децата, за тортура и друго сурово, нечовечно и понижувачко постапување и казнување, бидејќи како што се наведува во извештајот, повеќе од очигледно е дека целта на тепањето било добивање на признание од
малолетниците.