Институциите сакаат да ја сокријат одговорноста за случајот на Тамара Димовска, девојчето кое почина чекајќи да биде пратена на операција во странство поради тежок деформитет на рбетниот столб, велат во Хелсиншкиот комитет за човекови права.
Случајот со Тамара Димовска требало да се реши за еден ден бидејќи и во двете конзилијарни мислења има назнака„итно“ велат во Хелсиншки. Тие ги обелоденија документите од кои се гледа дека од поднесување на барањето на 28-ми април 2014-та година до денот кога е одговорено, односно е донесена првата негативна одлука поминале цели шест месеци.
Од хронологијата на настаните се гледа дека Фондот барал мислење и од трите приватни болници во државата. Одговор добиле само од Аџибадем Систина каде се вели дека не се во можност да ја извршат операцијата. И покрај тоа барањето на Тамара е одбиено, по што семејството Димовски ја алармира јавноста.
„Одеднаш министерот Тодоров се заинтересира за случајот и излезе со изјава дека Фондот ќе го плати лекувањето. Министерот не може да одлучува во име на Фондот. И повторно институциите се однесуваат бирократски, бараат нова документација на која повторно има назнака „итност“. За тоа време деформацијата на рбетот од 40 степени се зголемува на 80 степени“, изјави Уранија Пировска извршна директорка на Хелсиншкиот комитет.
До денот на смртта на Тамара не било донесено никакво решение и покрај ветувањето на министерот Тодоров.
„За нас нема дилеми дека тие луѓе што одлучувале калкулирале со нејзиниот живот, не покажале ниту трошка хуманост“, рече Пировска.
Иако Пировска инсистирала да биде примена во Фондот за здравство, не и било одобрено, а не било одговорено ниту на писменото барање.
Од Хелсиншки се надеваат дека во постапката на Обвинителството, Аспазија Софијанова, која е потписник на Решението од Второстепена комисија, ќе посочи кое било лицето кое ја дало наредбата од „горе“ за лекувањето на Тамара да чека до отварањето на спиналниот центар. Од таму најавија кривични пријави за директорите на Фондот за здравство за несовесно работење на службата, а во координација со семејството ќе биде поднесена пријава и за министерот Тодоров.
Ова се документите од кои се гледа дека конзилиум од лекари дале мислење Тамара „итно “да се прати на лекување во страство бидејќи можностите во дражавата се исцрпени.
.jpg)
