Хелсиншкиот комитет за човекови права на РМ денеска ги осуди „хомофобичните изјави на некои од актуелните пратеници кои преку дискриминаторски говор и говор на омраза ја деградираат ЛГБТИ заедницата, спротивно на реформската насока на политичко делување за која се залага новата Влада“.
-Сметаме дека реториката за традиционално и конзервативно општество која беше присутна во изминатите години имаше за цел да ги маргинализира и дополнително стигматизира ЛГБТИ луѓето во Македонија. Очекуваме ваквиот говор да се санкционира и политичките партии да се оградат од јавните настапи на своите членови, кои се во судир со уставниот принцип на еднаквост на сите граѓани, се вели во соопштението.
Од Хелсиншкиот комитет истакнуваат дека со големо внимание ја следат работата на сите државни органи кои учествуваат во процесот на донесување одлуки и спроведувањето на најавените реформи за демократизација на македонското општество и потсетуваат на на ветувањето на новата Влада дека ќе гради општество за сите, во кое ќе се санкционира дискриминацијата и говорот на омраза.
– Поттикнати од пратеничките расправи за правата и слободите на ЛГБТИ луѓето, потсетуваме на насилството на кое беше изложена ЛГБТИ заедницата изминатата деценија, но и на културата на неказнивост која произведе селективни стандарди за правда и еднаквост во македонското општество. Тоа беше забележано и во Програмата за работа на Владата на Република Македонија (2017-2020), имајќи предвид дека: „Се стимулираше и нетрпеливост кон разните општествени малцински или маргинализирани групи, како кон припадниците на ЛГБТ популацијата, со што предизвика дури и изблици на групно и поединечно насилство кон нив од екстремни групи и поединци“, велат од Хелсиншки комитет.
Оттаму потсетуваат дека новите програмски определби и реформската политика на новата владеачка структура треба да придонесат кон менување на состојбите со човековите права и слободи на ЛГБТИ луѓето, преку градење доверба во институциите на системот, како и преку професионалниот ангажман на сите кои учествуваат во процесот на донесување одлуки. Во оваа насока, потребно е да се консолидира заложбата на Владата на Република Македонија да ги промовира, штити и унапредува човековите права во државата и да создава институционални капацитети за нивна ефикасна заштита и одговорност на сите кои ќе се обидат да ги повредат човековите права – како што беше наведено во Програмата за работа на Владата (2017-2020).
Пратеникот од СДСМ Мухамед Зекири на својот Фејсбук профил постираше религиозна изрека од пророкот Мухамед која често се користи во контекст на осуда на хомосексуалноста. Тој за „Фокус“ изјави дека е против хомосексуалноста и геј браковите и тоа претставува негов личен став, иако социјалдемократските партии се залагаат за вредности спротивни на неговите верувања.
-Јас сум теолог и сум против геј бракови и против хомосексуалноста, тоа е мој личен став. Јас како личност имам право да имам ставови за одредени прашања, кои не секогаш се исти со партијата, изјави Зекири за „Фокус“.