Постои лек кој не значи дека ќе спаси живот но, може да помогне во ситуации како во случајот со 15 годишното момче кое почина во текот на давањето на анестезија на Клиниката за трауматологија, изјави во 24 Анализа д-р. Маја Мојсова раководител на КАРИЛ. Таа посочи дека тој лек кој не е нов, но е скап и го нема на Хируршките клиники.
„Тоа не е лек со магична моќ но, е добро да го има бидејќи може да помогне. Лекот Дантролен не е нов лек, но не е регистриран во Македонија, а многу тешко се наоѓа и во Источна Европа. Постои во студии дека може да помогне, што не значи дека ќе го спаси животот но, може да помогне во спасување и ние се уште бараме начин каде да го најдеме. Се надевам дека и тој проблем ќе се реши, можеби не треба да го има во секоја болница бидејќи е многу скап, но треба да постои некоја резерва која треба да се чува некаде во државата“, изјави Мојсова.
Доктор Мојсова најави дека е побарано да се набави тој лек после случајот со момчето кое почина од компликација по примена на анестазија, но потенцира дека тоа не зависи од лекарите туку од повисоките инстанци.
Сепак, НОВА неофицијално дознава дека пред извесно време во приватната болница Систина имало сличен случај кај три и пол годишно дете во текот на операцијата. Болницата го имала овој лек и детето било спасено. По извесно време на него му била направена уште една операција и поминало без никакви компликации, со употреба на друг анестетик.
Како што објави НОВА момчето било донесено како итен случај со повреда на двете колена од пад на час по физичко воспитување. Смртта настапила кога му бил даден инхалационен анаестетик. Анестезиолозите тврдат дека не се работи за алегрија, туку се сомневаат дека настанала малигна хипертермија која се случува во многу ретки случаи кај пациенти кои имаат генетска мутација и во комбинација со анестетик може да настапат компликации и смрт.
Директорот на Клиниката, д-р Илир Хасани, вели дека се работи за состојба што не е забележана во Македонија и во околните земји во последните две децении.
„Се појавува класична клиничка слика на состојба што ние ја викаме малигна хипертермија. Тоа можеме да го тврдиме клинички, но не можеме сè уште ниту лабораториски ниту прецизно да кажеме дека тоа е таа состојба. Се работи за една нестандардна, агресивна и многу ретка состојба на која организмот силно реагира на некои од инхалационите анестетици што се применуваат. Оваа реакција е невидена во последните 20 години не само во Македонија туку и во околината“, вели Хасани.
Тој вели дека почитуван протоколот при вршење на операцијата, како и анестезиолошките протоколи.
Министерството за здравство соопшти дека ќе направи анализа за случајот. И од таму велат дека првичните информации говорат дека станува збор за малигна хипертермија која се случува во многу ретки случаи кај пациенти што имаат генетска предиспозиција.
„Целиот кадар на Клиниката за трауматологија бил максимално ангажиран во напорите да се спаси момчето. Исто така, формирана е и комисија на Клиниката, која ќе го анализира случајот и по добивање на официјалните резултати од обдукцијата, ќе ѝ се соопштат транспарентно на целата јавност. Во наредните денови се очекуваат и официјалните резултати од Институтот за судска медицина“, велат од Министерството за здравство.