Македонската Влада треба да обезбеди длабока истрага во серијата анти-ЛГБТ напади во јуни и јули 2013 година, се вели во писмото на „Хјуман Рајтс Воч“ (Human Rights Watch), до премиерот Никола Груевски.
Жртви на нападите беа и борците за човекови права кои присуствуваа во ЛГБТ центарот за поддршка за време на Неделата на гордоста.
Во последните напади, на 5 јули, неидентификувани лица се обидоа да подметнат пожар во Центарот за поддршка. Прелиминарните резултати покажаа дека некој се качил на покривот, отстранил неколку ќерамиди, истурил бензин и го запалил.
„Анти-геј насилниците таргетираат луѓе кои се борат за еднакви права по основа на сексуална ориентација и еднаквост на половите, а македонската Влада тоа како да не го гледа“, изјави Борис Дитрих, директор во Хјуман Рајтс Воч на полето на ЛГБТ правата.
„Ниеден претставник на Владата јавно не излезе со критика за нападите, оставајќи ја ЛГБТ заедницата да стравува за понатамошно насилство и дискриминација“, додаде тој.
>> (ВИДЕО) Што регистрираа камерите од нападот врз ЛГБТ центар
>> Дипломатскиот кор го осуди насилството врз ЛГБТ центарот
Неделата на гордоста беше отворена во ЛГБТ центарот на 22 јуни. Сведоците велат околу 40 активсти биле внатре за време на заканите на околу 30 луѓе кои со навредливи и хомофобични слогани им се заканува на луѓето внатре. Тогаш насилниците го каменуваа објектот, фрла шишиња и цигли повредувајќи еден полицаец.
Повеќето од луѓето кои биле внатре поднесоа жалби до полицијата, но засега никој не е уапсен а властите не дадоа никаква информација за евентуална истрага.
„Полицијата е одговорна за безбедноста на сите Македонци, и одговорна е да ги истражува сите криминални дела“, вели Дитрих. „Премиерот и другите владини министри треба да покажат политичко лидерство и да ги повикат сите граѓани да се воздржат од насилнички анти-ЛГБТ дејствија“ дополнува тој.