Портпаролот на воената хунта во Тајланд денеска соопшти дека ќе се почитува законот за воена состојба во државата според кој, без исклучок, оние што се приведени поради сослушување мора да бидат ослободени најмногу една недела по приведувањето.
Меѓу вчера приведените се и досегашната премиерка Шинаватра, голем број нејзини министри и директори на државни агенции, како и водачите на про и анти владините демонстрации што започнаа во ноември минатата година. Од притворот армијата почна да ги ослободува заточените.
Прв дома си заминал еден од водачите на опозицијата, поранешен премиер, Абшит Веџајива, кој докажал дека нема директно влијание во нередите.
Воената хунта соопшти дека приведените се сместени во луксузни објекти и имаат забрана за меѓусебно комуницирање.
Портпаролот на хунтата додал дека премиерката Шинаватра, која доброволно се одзвала на повикот за сослушување, дошла со приватен блиндиран автомобил и дека ќе и биде дозволено со истиот автомобил да си замине.
На списокот на воените власти за сослушување има уште 35 лица кои не се пријавиле сами, или не биле приведени. За нив е издаден ултиматум според кој, ако до крајот на денот не се пријават, ќе бидат уапсени.