Околу 120. 000 евра беа потрошени за поправка на апаратите за зрачење минатата година, особено кога поради горештините тие почнаа секој ден се расипуваат.
Листите на чекање се зголемија, така што еден пациент болен од рак во просек чека по три месеци за да дојде на ред за зрачење. Новиот акцелератор, кој се очекува со полна пареа да започне да работи во мај, нема веднаш да ги намали гужвите.
Директорот на Клиниката за онкологија Милан Ристевски најави дека чекањето ќе се намали минимално, на два и пол месеци, за до крајот на годината да се дојде до месец и половина, време кое мора пациентите да го поминат во чекање за да започнат да се лекуваат.
Ристевски потенцира дека поучени од лани, летово за време на високите температури овие апарати ќе паузираат со работа, што уште еднаш ја отвара дилемата дали воопшто листите на чекање ќе се намалат. Згора на се на Клиниката немаат и доволно кадар, физичари кои треба да работат со овој апарат.
Во земјите од ЕУ, пациентите чекаат најмногу една недела за да започнат со неопходното лекување. Кај нас, најтешко болните чекаат со месеци, а затоа време болеста напредува.