Во Мексико е украден камион кој превезувал многу опасен радиоактивен материјал за медицински потреби, објави Меѓународната агенција за атомска енергија (ИАЕА).
„Во моментот на кражбата радиоактивниот материјал беше правилно заштитен. Но би можел да биде потенцијално опасен доколку заштитата биде тргната или оштетена“, се вели во соопштението на оваа агенција ОН, со седиште во Виена.
Кражбата се случила на втори декември. Камионот од болницата превезувал „кобалт 60„ кој се користи за радиотерапија. Возилото е украдено во Тепохака, место близу главниот град на Мексико. Во тек е истрага а мексиканските власти апелираа до граѓаните да јават ако имаат било каква информација за кражбата.
Овој радиоактивен материјал не може да се употреби за изработка на конвенционални нуклеарни бомби, но во комбинација со класичен експлозив, може да се употреби за изработка на таканаречени „валкани бомби„ чија експлозија, радиоактивно загадува широк простор.