Изборот на Марјан Цветковски за директор на МРТ наиде на разочарување во медиумската сфера. Тој доби нов мандат откако десет членови на Програмскиот совет на МРТВ гласаа за него.
Ова е трет мандат за Цветковски, кој својата кариера на директорување ја започна во март 2012 година – по три години во 2015 година беше реизбран, за вчера да добие „нова шанса“.
МРТ во времето на Цветковски стана синоним за партизиран јавен сервис, што беше потврдено во речиси сите извештаи на Европската комисија и во анализите на домашните невладини организации.
Но и покрај сериозните критики кои беа упатени за начинот на кој се известува, видливи промени не се преземаа. Владата сега најавува дека Цветковски ќе биде директор до усвојувањето на новиот закон за аудио и аудиовизуелни услуги.
„Веднаш по усвојување на новиот закон за аудио и аудиовизуелни услуги ќе се овозможи овие раководни позиции во МРТ да ги водат професионалци, непартиски личности. Истото ќе важи и за Агенцијата за аудио и аудиовизуелни услуги (АВМУ). Тоа значи дека овој избор на важност е сѐ додека не го усвоиме законот“, рече Миле Бошњаковски, портпаролот на Владата, по вчерашните реакции во јавноста за избор на старо-новиот директор на МРТ Марјан Цветковски.
Законските измени, кои веќе подолго време се готват, меѓу другото предвидуваат кандидатите за членови на Програмскиот совет на МРТ да имаат искуство од најмалку 8 години во струката, а на конкурс ќе можат да се пријават со поддршка од најмалку две граѓански организации во областа на унапредувањето на човековите права, медиумите, новинарските здруженија и слични.
„Владата на Република Македонија нема никаква поврзаност со изборот на директорот на Македонската радио телевизија. Овој избор е одлука на Програмскиот совет на МРТ кој сѐ уште функционира во стариот состав, а граѓаните на Република Македонија добро знаат кој членува во тој состав, на кој начин работеше и под чии влијанија“, рече Бошњаковски.
Со ова, дополни тој, ќе се прекине нетранспарентноста и партизацијата на МРТ и на Агенцијата. Новиот закон се очекува да помине на владина седница до крајот на неделава.
Критиките го следат Цветковски во целиот негов мандат.
„Длабинската анализа на програмските содржини покажа дека МРТ не само што не ги исполнува во целост своите функции на јавен радиодифузен сервис на граѓаните, туку во определени ситуации целосно се става во улога на директен актер и инструмент за пропаганда на власта. Централните вести на МРТ1 (во 19.30 часот) наместо да им обезбедат професионална, квалитетна, аналитичка, објективна и непристрасна информација на граѓаните за исклучително важните политички збиднувања во државата тие станаа гол трансмитер, но и пропаганден засилувач на ставовите на власта и на нејзините притисоци врз опозицијата“, пишува во Анализата на НВО Инфо Центарот за МРТ во 2013 година.
Наредната година ОБСЕ/ОДИХР, во анализата за известувањето на јавниот сервис за претседателските избори, ќе констатира дека „Јавниот радиодифузен сервис, не успеал да обезбеди избалансирано и рамноправно известување и покажал значителна пристрасност во полза на владејачките партии“.
МРТ тогаш организираше една дебата на кандидатите, по која Јавниот радиодифузер организираше програма со дискусии која главно се фокусираше на перцепцијата за неуспесите на Пендаровски, ке напише ОБСЕ/ОДИХР во својот извештај.
Наредната, 2015 година, Европската комисија констатира дека загрижува уредувачката независност на МРТ која ја поддржува власта и селективно известува за активностите на опозицијата и на невладините организации.
МТВ, под раководство на Цветковски не објави ниту една од „бомбите“ кои ги пушташе СДСМ, а во кои се слушна и како наместо јавен сервис, МРТ била претворена во партиска телевизија.
Цветковски, дојде на чело на МРТ од порталот „Кирилица“, каде што беше директор. За него, судот има донесено и пресуда по кривичната пријава која ја поднесоа дел од новинарите, вработени во порталот за неисплатени плати и неплатено пензиско и здравствено осигурување, но долговите не им беа исплатени.
Според анализата на ПИНА, платформа за истражувачко новинарство, долговите на МРТВ се поголеми од 20 милиони евра.
Освен Цветковски, со десет членови на Програмскиот совет вчера повторно беше избран и Харин Ибрахими.
Реформите во МРТ се меѓу клучните поенти и во последниот извештај на Прибе за демократизација на општеството, кои Владата се обврза дека ќе ги спроведе со планот 3-6-9.
Според последниот извештај на Репортери без граници, македонското новинарство, според слободата на изразување е на 111 место од 180 држави.