Светската организација за дијебетис потврди: Секој организам реагира различно при промената на инсулин, односно различно, на различен тип на инсулин. Ова денеска за НОВА го соопшти претседателот на Здружението за детски дијабетис, Цвете Серафимовски.
„ Добивме писмен одговор од Светската организација за дијабетис (IDF) . Во одговорот го потврдуваат нашето тврдење дека секој организам реагира различно, на различен инсулин”, изјави за НОВА, Серафимовски, претседател на ова Здружение.
Тој, членовите на ова Здружение и останатите болни од дијабетис само овој одговор го сметаат за единствено компетентен.
Викендов пак, се огласи и Здружението на ендокринолози кои се произнесоа дека промената од еден на друг инсулин нема да влијае на здравјето на пациентите.
Во меѓувреме над 10 000 пациенти кои останаа без неоходниот лек и се принудени да се префрлат од еден на друг вид инсулин си го поставуваат прашањето, постои ли опасност компанијата „Новонордск“ која 22 години ги снабдува дијабетичарите со инсулин да се повлече од Македонија.
Нивниот страв се заснова на фактот, што некои од нив со години и децении го примаат инсулинот кој кај нив се покажал како добар и успешно го нормализира нивото на шеќерот во крвта. Дијабетичарите тврдат дека и инсулините од другите производители се исто така квалитетни, но некои пациенти едноставно, не ги поднесуваат добро.
Во претставништвото на „Новонордиск“ велат дека чекаат да видат што ќе се случи со тендерот, а во исто време чекаат и на инструкции од централата на компанијата во Цирих.
Директорот на претставништвото во Македонија, Димитар Стојменовски, за НОВА, вели дека се ставени во многу незавидна ситуација.
„Ставот на компанијата е дека, кој сака да работи со нашите инсулини, нека работи, ако не ќе се повлечеме. Партнерството е прва и основна работа, изјави за НОВА Стојменовски.
Во исто време, надлежните постојано излегуваат со ставот дека промената од еден вид на друг инсулин нема штетни последници по здравјето, а со овој став излегоа и лекари од скопските клиники. Пациентите пак, велат дека тоа предизвикува шок за организмот, а најризична категорија се децата, врз кои треба да се прават експерименти за да се утврди, кој инсулин им одговара, а кој не.