По три дена преговори за Комисијата за избори и именувања договорено е претседателското место да го има ВМРО-ДПМНЕ, а на чело на Комисијата да биде Илија Димовски.
Со ова се отвора можноста конститутивната собраниска седница да продолжи во понеделник, кога треба да се избере собранискиот спикер.
Оливер Спасовски од СДСМ вели тие го прифатиле “неразумното барање“ од ВМРО ДПМНЕ со цел да се откочат процесите во Р.Македонија, да профункционираат демократските тенденции и се со цел ниту граѓаните ниту законодавниот дом да не бидат заложници на било кој политичар или политичка партија.
– Иако постоеше едно од низата неразумни барања кое што беше поставено од ВМРО ДПМНЕ, ние прифативме претседателот на Комисијата да биде од ВМРО ДПМНЕ се со цел да се откочат процесите во Р.Македонија, да профункционираат демократските тенденции и се со цел ниту граѓаните ниту законодавниот дом да не бидат заложници на било кој политичар или политичка партија во Македонија. На тој начин сакаме да го ставиме во функција Собранието на Р.Македонија како највисок претставнички дом на граѓаните на Р.Македонија. Сметам дека ова е потребно и ова е добро заради тоа што најмногу штета трпат граѓаните на Р.Македонија, најмногу штета трпи економијата, вели Спасовски.
Комисијата брои 13 членови а во неа ВМРО-ДПМНЕ ќе има шест членови, СДСМ 5, и по еден од ДУИ и Беса.