Новата делта мутација на коронавирусот стана доминантна во Германија, чиј удел првпат презеде доминација со 59 проценти, соопшти Институтот „Роберт Кох“.
Институтот посочува дека кај веќе две третини од позитивните ПЦР-тестови е утврдено дека станува збор за инфекција со делта мутација на Ковид-19, додека само кај една третина заразата е со „стариот“ алфа сој.
Уделот на алфа сојот се намали многу брзо од 91 процент кон крајот на мај, на 33 проценти кон крајот на јуни. Другите мутации во Германија моментно немаат никаква улога, наведува Институтот.
Од друга страна, францускиот секретар во Министерството за европски прашања, Клеман Бон, ги советуваше граѓаните на Франција да избегнуваат летни одмори во Шпанија и Португалија поради ризикот од ширење на делта сојот на Ковид-19.
Министерството прецизираше дека патувањата во Шпанија и Португалија и каде било во Европа се слободна волја на граѓаните и дека власта дава само пријателски совети.
Шпанскиот министер за здравство предупреди дека младите можат да развијат тешки облици на коронавирусот и побара соработка во спречување на стапката на инфекција, која е двојно зголемена кај младата невакцинирана популација.
Само неколку недели по нивното отворање, ноќните клубови во источниот дел на Шпанија нема да работат повторно од петок со цел да се запре ширењето на делта сојот.
Холандија, пак, која меѓу првите земјите во Европската унија се откажа од речиси сите мерки за заштита од коронавирусот, повторно бележи голем пораст на новозаразени.
За помалку од две недели, дневниот број на позитивни тестови се зголеми речиси шестпати, од 550 случаи на 26 јуни на околу 3.700 вчера, јави Бета.
Најголем број нови инфекции се откриени кај млади луѓе, тинејџери и 20-годишници – старосна група која е последна во редовите за вакцинација и се уште не е вакцинирана или ревакцинирана.
Бројот на луѓе во болниците засега е се уште мал, благодарение на зголеменото ниво на вакцинација, особено постарите лица и граѓаните со други здравствени ризици, кои досега главно се имунизирани.
Институтот за јавно здравје на Белгија објави дека во првата недела на јули стапката на репродукција на Ковид-19 повторно надмина 1, што значи дека вирусот повторно забрзано се шири, јави дописничката на МИА од Брисел.
Стапката на репродукција на вирусот кога надминува 1 е знак дека заразата пребрзо циркулира помеѓу населението. Во првата недела на овој месец стапката е од 1,1.
Бројот на новозаразени во Белгија е зголемен за 70 отсто во споредба со претходната недела, додека стапката на позитивни тестови е зголемена за 53 отсто, соопштија властите.
Сепак бројот на хоспитализации и на смртни случаи продолжува да се намалува, што се должи на високата стапка на вакцинација во Белгија, која достигнува речиси 80 отсто од возрасното население.
Според портпаролот на кризниот штаб за Ковид-19 делта сојот во Белгија сега сочинува 50 отсто од целокупниот број заразени.