Голема е веројатноста исчезнатиот малезиски авион да се наоѓа во јужниот дел каде што се води потрагата, во Индискиот океан, вели службеник од американската влада за CNN.
„Се работи за област која не е редовна патека за бродовите, за комерцијалните летови, со по некој рибарски чамец и без острови“, објаснува тој, предупредувајќи дека потрага може да трае со недели.
Од друга страна, веќе 12 дена се бара авионот со кој патуваа 239 луѓе, а досега е покриена област слична на големината на САД.
Истражителите од 26 земји и понатаму се обидуваат да го лоцираат авионот во површина која се протега од Азија до Индискиот океан.
Воедно на денешната прес-конференција во Малезија истакнати се неколку факти.
-Некои податоци се избришани од симулаторот најден во куќата на пилотот, изјави министерот за транспорт на Малезија, Хишамудин Хусеин, додавајќи дека се работи на враќање на информациите.
Тој напомена дека малезиските власти добиле информации од сите земји за патниците, освен САД и Русија. Засега ниедна значајана поврзаност не е откриена.
– Во Малезија пристигнаа информации од радари од различни земји, а шпекулациите дека авионот е забележан од луѓето на Малдивите се неточни, изјави Хусеин.