Малезија започна истрага за тероризам, по исчезнувањето во саботата на Боингот 777 на Малезија Еарлајнс со 239 луѓе, откако се утврди дека мистериозни патници патувале со украдени пасоши. Во истрагата ќе се вклучи и американскиот ФБИ кој испраќа свои луѓе во Малезија.
Владата во Малезија информираше дека имало четири сомнителни лица во авионот кој патувал помеѓу Куала Лумпур и Пекинг а помеѓу нив двајца патувале со украдени патни исправи.
Авионот се уште не е пронајден откако радарите загубиле контакт со него еден час по полетувањето, помеѓу истокот на Малезија и југот на Виетнам, без да добијат сигнал за тревога.
Во текот на истрагата нафтени дамки се забележани во близина на морскиот брег во крајниот јужен дел на Виетнам, за кои се претпоставува дека се првиот знак од исчезнатиот малезиски патнички авион, соопштија властите во Виетнам.
Фотографија на дамките на нафта што ја направила виетнамската армија
Дамките се со должина од 15 км и тие потсетуваат на дамки кои останале од гориво на урнат авион. Но, морските екипи кои стасале на тоа место не успеале се уште да пронајдат траги од авионот. “Ништо не успеавме да локализираме ниту да видиме”, изјави шефот на малезиската цивилна авијација.
Утринава се беше потврдено дека двајца патници патувале со украдени пасоши. Имињата на Австриецот Кристијан Козел и Италијанот Луиѓи Маралди стојат на листата на патниците но ниту еден нив двајца не се наоѓал во авионот. Двајцата се јавиле дека се живи и дека не се качиле во авионот. Нивните пасоши биле украдени во 2012 и 2013 години во Тајланд.
Според американската истрага врската со тероризмот не е најдена и рано е да се извлекуваат заклучоци. Според ФБИ украдените пасоши можеби немаат врска со тероризмот и можеби се работи за крадци.
Операциите на потрагата по авионот продолжуваат. Бродови во зоната испратија Кина, Виетнам, Малезија, Филипини и САД.
Авионот бил стар 11 години а екипажот бил искусен и добро обучен. Малезиската авио компанија е безбедна и досега имала само три несреќи во 66 години постоење. Најстрашната катастрофа со 100 жртви се случила во1977 година кога еден авион се урнал на југот на земјата откако авиопирати се обиделе да го преземат.