Речиси шест од десет Грци, односно 58 отсто смета дека Договорот од Преспа е добар договор или договор со доста компромиси, но неопходен, покажуваат резултатите од истражувањето на јавното мислење спроведено од агенцијата „Капа research“ за фондацијата „Фридрих Науман“ посветено на либерализмот во Грција, во кое граѓаните одговарале на прашања поврзани со 10 различни теми, јави дописничката на МИА од Атина.
Споредбено со резултатите од 2018 година од истата агенција, ставот на Грците за Договорот од Преспа е променето, со оглед на тоа дека тогаш, 42 отсто сметале дека договорот е добар (18 проценти) или договор со доста компромиси, но договор што требаше да се постигне (24 отсто), додека пак 54 проценти оцениле дека е лош.
Во новото истражување, на прашањето „Какво е вашето мислење за Договорот од Преспа?“, 40 отсто одговараат дека е лош договор и Грција не требаше да го потпише.
Од анкетираните 33 проценти сметаат дека е договор со доста компромиси, но требаше да се склучи, а 25 отсто одговориле дека е добар договор.
Во однос на надворешната политика на земјата, најважно прашање за 94 проценти од испитаниците се грчко –турските односи и искористувањето на природните извори во Егејското море, а потоа следат мигрантското/бегалското прашање (72 проценти), односите на Грција со ЕУ (32 отсто), кипарското прашање (24 проценти), Македонија и имплементација на Договорот од Преспа (15 отсто), со седум отсто се односите на Грција со другите балкански земји, како и со САД итн.
За Европската унија, 75 проценти рекле дека иднината на земјата е во ЕУ.
На прашањето кој е карактеристичен пример на автентичен либерал во Грција, 28,2 отсто го посочиле актуелниот грчки премиер Кирјакос Мицотакис.
Опширното истражување на јавното мислење на агенцијата „Капа research“ за фондацијата „Фридрих Науман“ било спроведено од 14 до 22 октомври и вклучени 1.214 лица со право на глас од 13 грчки периферии.