Нов пораз на Македонија во финиш на натпревар во квалификациите за СП 2018. „Азурите“ вечерва славеа со 3:2 со голот на Имобиле во втората минута од есктра времето
Нова добра игра и нов пораз на фудбалската репрезентација на Македонија во циклусот квалификации за Светското првенство во 2018 година. По Израел и Италија вечерва ги однесе бодовите од „Филип Втори“. „Азурите“ ја добија „резултатската нишалка“ во Скопје со голот на Чиро Имобиле во втората минута од судиското продолжение.
Составот на Вентура поведе преку Белоти во 23 минута. Во второто полувреме следуваше пресврт на Македонија во само две минути. Несторовски израмни на 1:1 во 57 мунута, а Ферхан Хасани погоди две минути по него за водство од 2:1. Во период во кој гостите делуваа дезиорентирано на теренот.
Момчињата во црвено имаа шанса и за трет гол, но кога нема да се искористат своите прилики, на сцена стапува непишаното фудбалско правило дека следува казна. Тоа и се случи во 75 минута кога играчот на Лацио, Чиро Имобиле, израмни на 2:2, а истиот играч во 5-минутното продолжение по втор пат го совлада Богатинов за огромна радост на италијанската клупа.
Десната ракавица на Буфон остана за спомен во Скопје
Неколку навивачи од трибините по мечот се обидоа да влезат на теренот додека фудбалерите се уште беа во него, при што највпечатливо беше едно момче на возраст од 10-тина години кое му избега на обезбедувањето и потрча во прегратки на Буфон. Голманот на италијанската репрезентација како голем професионалец ја исполни желбата на младиот навивач, го прегрна и во спомен му ја даде десната ракавица. Потоа Буфон отиде кон источната трибина, до блокот во кој беа сметени италијанските навивачи, ги соблече шорцевите и ги фрли кон гледачите. Потези што наидоа на одобрување и аплауз од домашната публика.