Претседателот на Република Македонија, Ѓорге Иванов денеска ќе им додели ордени на ракометарите и ракометниот клуб Вардар.
Специјалната церемонија ќе се одржи попладнево, по прославата на плоштадот во Скопје.
„Со својот подвиг ракометарите на Вардар апсолутно ги заслужија високите признанија. Со вашата желба, мотивираност, сплотеност и тимски дух ни покажавте дека не постојат искушенија и предизвици кои не можат да се надминат и врвови кои не можат да се освојат. Вие сте пример од кој ќе учат и ќе се мотивираат и сегашните и идните генерации”, изјави Иванов.
Тој е уверен дека успехот на ракометарите ќе ја обедини целата нација и ќе биде импулс и понатаму заеднички да веруваме и да навиваме, да бидеме сплотени и во победите и во поразите како составен дел од спортот и од животот.
„Спортот како филозофија на животот треба да биде алтернатива на пороците на денешницата. Благодарение на овој успех верувам дека сега и да нема дете во Македонија кое не се замислува како ракометар или спортитст. Сите заедно да помогнеме овој моментум да резултира со раѓање на нови шампиони”, рече Иванов.