Сигурен сум дека во вториот круг разликата ќе биде уште поголема. Благодарам за поддржувачите, за ВМРО-ДПМНЕ, за коалицијата За подобра Македонија!
Пред 20 дена, тука ја започнавме кампањата. Тогаш реков дека Охрид никогаш не нè разочарал. И тоа го покажа уште во првиот круг, рече синоќа кандидатот за претседател на ВМРО-ДПМНЕ, Ѓорѓе Иванов.
– Имавме фер и демократски избори какви што и доликуваат на Македонија. Граѓаните имаа избор која од понудите ќе ја изберат, да изберат кој ќе работи за нивната иднина.
Во огромно мнозинство граѓаните дадоа поддршка на нашите реформи, тимска работа, чесност, патриотизам, отворање работни места, инвестиции.
– Во текот на овие две недели, многу македонски граѓани ќе се соочат со два предизвика.
Првиот предизвик е кога некои ќе се обидуваат да ве убедат да не гласате, бидејќи немало за кого да гласате, бидејќи немало разлика.
– Самите сте сведоци дека постои позитивна разлика. Разликата ја препознава Европската унија, која ни даде 5 позитивни извештаи и препораки за почеток на преговори за членство.
Разликата ја препознава и Северноатлантската Алијанса, која вели дека ги исполнуваме критериумите за членство во НАТО.
– Разликата ја препознаваат светските финансиски институции кои ја рангираат Македонија меѓу најдобрите светски бизнис дестинации. Разликата ја препознаваат и странските инвеститори кои отвораат фабрики во Македонија. Инвестираат насекаде во Македонија. А ќе инвестираат и тука, во Охрид и Охридско-Струшкиот регион и ќе отворат нови 1800 нови работни места, истакна Иванов.
– Непринципиелната кампања што се водеше против нас се покажа како неуспешна. Ме напаѓаа без аргументи, со етикети, непристојно. Но големината е да одговараме на такви коментари. Тоа говори за нив, не за нас. Тие што немаат успеси и проекти зад себе, што немаат програма пред себе, тие водат таква кампања. За овие години македонските граѓани научија да прават разлика. Тоа го покажаат вчера, тоа ќе го покажат и на 27 април.
Покажавме дека Македонија се сака со дела, рече во дел од својот говор пред охриѓани, Иванов.