Вчерашниот настап на премиерот пред синдикатите, од страна на синдикатите беше оценет како историски чин. Да, ќе кажам историски, само во негативна конотација. Во време кога работниците постојано ги губат своите работнички права, во време кога постојано остануваат без работа и без плата, Синдикатот и премиерот си делат комплименти. Премиерот Груевски вчера настапи со старо нови ветувања, ветени уште пред 8 години, истакна Цветанка Иванова, пратеничка и претседателка на собраниската Комисија за труд и социјална политика.
-Класичен пример за тоа е ветувањето за 5 процентно покачување на платата на административците. Пред да го даде тоа ветување, премиерот Груевски требаше да одговори на следниве прашања:
-Каде е, или зошто не е реализирано ветувањето за покачување на платите за административците за 10 проценти во 2009 година, и со закон регулирано?
-Каде отиде ветувањето за покачувањето на платите за административците за 10 проценти, во 2010 година?
-Каде отиде и зошто не се покачи платата на административците, во 2012 година кое што со закон исто така е регулирано и одложено за подоцна?
-И каде е покачувањето на платите за административците, во 2013 година, кое што сега премиерот го ветува како ново ветување, од септември 2014 година, но не за 10 проценти, онака како што е ветено во преродбата, туку повторно за 5 отсто, рече Иванова.