Исламската верска заедница не се појави на Третата конференција за меѓурелигиски и меѓуцивилизациски дијалог, која започна попладнево во Скопје. Со ова ИВЗ ја оствари најавата за бојкот на конференцијата на која присуствуваа лидерите на Православната, Католичката, Евангелско-Методистичката црква, Еврејската и другите верски заеднци од Македонија како и претставници на верски институции до светот.
– Бојкотирањето на дијалогот претставува бојкот на самиот себе и ја поткопува искреноста на вредностите кои се декларираат. Најдобар и најцивилизиран начин за надминување на евентуалните недоразбирања и проблеми е дијалогот и ништо не би смеело да го условува неговото одвивање – рече премиерот Никола Груевски во поздравниот говор до Конференцијата.
Министерката за култура, Елизабета Канчевска-Милевска, рече дека Република Македонија е пример за тоа како се негуваат, почитуваат и унапредуваат културите на сите етнички заедници кои живеат во нашата земја.
– Би сакала да забележам дека македонската Влада силно ги поддржува сите иницијативи кои се стремат кон постојан дијалог и соработката меѓу различните народи, култури и религии во светот. Оттука, не случајно, Република Македонија е една од ретките земји во светот која со успешната реализација на Првата, Втората, а верувам и на третата по ред светска конференција, докажа дека е лидер на платформата за меѓурелигиски дијалог, соживот и толеранција – рече министерката за култура.
На конференцијата, која денеска и утре се одржува во Скопје, се обратија и претставници од странските партнери во организацијата на настанот – од УНЕСКО, Генералниот секретаријат на НАТО за жени, мир и безбедност и од Комитетот за религии и интеркултурно образование при Советот на Европа.
Тема на конференцијата е „Слободата и достоинството – основни вредности во меѓучовечките, меѓурелигиските и меѓукултурните односи“. Со неа ќе бидат одбележани три јубилеи: 1700 години од Миланскиот едикт – добивање слобода на христијанството; 70 години од холокаустот на Евреите и 10 години од Самитот на шефови на држави од Југоисточна Европа „Дијалог меѓу цивилизациите“ во рамките на УНЕСКО и Охридската порака за мир, инициран од покојниот претседател Борис Трајковски во 2003 година.