Грчкото претседателство со ЕУ треба да се искористи и покрај тоа што Македонија не почна преговори со ЕУ и тоа преку контакти на повеќе нивоа кои треба да ги доближат двете земји за да не бидат наредните шест месеци загубено време.
Ова е иницијативата која денес во Брисел претседателот на СДСМ Зоран Заев му ја предложи на комесарот за проширување Штефан Филе со кој денес се запозна на прва официјална средба. Комесарот му рекол на Заев дека уште оваа недела ќе оди во посета на Атина и дека ќе ја презентира оваа иницијатива.
„Побаравме да се искористи грчкото претседателство за решавање на спорот и дадовме неколку идеи за тоа. Очекуваме дека сето тоа зависи од Република Македонија, опозицијата и власта и дека спорот ќе биде решен“, изјави Заев по средбата со комесарот.
Според Заев на средбата е разговарано за името но и за вантрешно-политичките реформи. „Се очекува јасен договор со власта за разграничување на партијата со власта, што е кажано и во извештајот на ЕК, но и за регулативите за изборното законодавство. Се надеваме дека веќе утре на работните групи за изборно законодавство таа препорака ќе биде имплементирана“, рече Заев.
Тој додаде исто така дека е разговарано и за слободата на медиуми. Тоа го потврди и комесарот Филе во соопштението издадено по средбата.
ЕК вели дека на средбата се разговарало за најитните реформи во Македонија, особено правната држава и слободата на медиумите како и изборното законодавство. Во тој контекст Филе го посочи значењето на фер услови за политички натпревар во Македонија.
Филе ја потврди европската перспектива на земјата и подвлече дека е потребно подобрување на политичкиот дискурс во земјата и важноста за национален консензус за заедничката цел која е ЕУ интеграцијата.
„Со примената на договорот од 1 март ЕК ќе биде спремна да го помогне реформскиот процес преку Високиот политички дијалог, доколку властите останат подготвени за примена на реформите и за понатамошно подобрување на добрососедските односи“, рече Филе по средбата со Заев.