Деновиве, во престижната поетска едиција „Бореа“, Блесок од Скопје во печатен и електронски формат ја објави книгата поезија од Горана Митровиќ, „Индиго есен“.
Книгата поезија на Горана Митровиќ „Индиго есен“ на книжевната сцена донесува нов и самостоен глас, изградуван внатре во себе во текот на изминатите дваесет години; иако станува збор за дебитантска книга поезија, „Индиго есен“ по својата зрелост и тежина може да се смета и за избор на најдоброто од најдоброто во поезијата на Горана Митровиќ – велат од Блесок.
Горана Митровиќ
Индиго есен
Сонувам
низ една индиго есен во мене
со сончев поглед меѓу веѓите
и парче месечина под јазикот
за да сјае ова внатре
чии ѕидови немирна совест ги тетовира
сини листови
ќе ги прекријат снегови
до некоја пурпурна пролет
сини листови
нежни, откинати од моето постоење
– да ги оставам да талкаат –
сонувам
со магла во косата
и милост во очите
ветрот ми остава
сомнителен бакнеж на левото рамо
како потсетник на осаменоста
(од „Индиго есен“)