Изградбата на гасоводот „Јужен тек“ на Балканот е суспендирана, како последица на политичката криза во Украина, изјави американскиот амбасадор Карлос Паскал, дипломат и поранешен пратеник за меѓународни енергетски прашања.
Паскал потенцира дека како резултат на украинската криза, Брисел одлучил целосно да го запре издавањето на дозволите кои се потребни за изградба на клучниот гасовод, од кој и Македонија се надевва да добие крак.
„Гасоводот „Јужен тек“ е многу важно прашање. Тој нема да донесе нови количества на гас во Европа, туку само ќе пренасочи гас кој сега минува низ Украина преку друг гасовод. За да можеме да го изградиме овој гасовод, „Газпром“ и нивните партнери мора да добијат огромен број дозволи од Европската Унија. ЕУ најави дека го суспендирала тој процес и нема да дозволи нови чекори во таа насока. Нема банка која ќе одобри средства за изградба на гасоводот доколку нема дозволи од Европската унија, така што проектот сега е запрен и нема перспектива да оди напред“, изјави Паскал, претставувајќи ја енергетската состојба во Европа по украинската криза.
Тој смета дека главниот аргумент што ќе го користи ЕУ е монополската позиција на „Газпром“ во Русија и ќе бара реципроцитетно отворање на пазарот пред да може оваа компанија да инвестира во Европа. Во отсуство на „Јужен тек“, единствената реална опција за снабдување на Балканот со гас, е гасоводот ТАП на гигантот БП. Овој гасовод треба да донесе азербејџански гас, кој ќе биде нов производ на европскиот пазар, преку Турција, Грција, Албанија и Јонско Море до Италија.