Родителите ќе можат во сите 17 породилишта во државата да го добијат изводот на бебето уште додека мајката е во породилиштето, со што проектот „Добредојде бебе“,промовиран пред две недели, станува достапен во сите породилишта низ државата.
– На мајките им се нуди можност, во рок од 48 часа, пред да бидат испишани од породилното одделение да добијат извод од матичната книга на родените. Услов е да се приложат личните карти на двајцата родители, кои треба да имаат одредено име на детето. За таа цел, тим од МојТермин, во изминатиот период ги посети сите породилишта во државата, беа одржани повеќе обуки за вработените и во практика се тестираше издавањето извод за родители кои тоа го сакаат, изјави заменик-министерот за здравство Гоце Чакаровски за време на посетата на Општата болница во Куманово.
Досега се издадени 91 извод на новородени на жени породени во Универзитетската клиника за гинекологија и акушерство (ГАК) и во Специјалната болница по гинекологија и акушерство „Мајка Тереза“ во Чаир. На Клиниката за гинекологија, од вкупно 466 новороденчиња, услугата ја искористиле 33 родители, а во Специјалната болница во Чаир од вкупно 391 новороденчиња, извод уште во породилиште добиле 58 новороденчиња.